疫情下，香港失業率屢創新高，人人都渴求有份穩定長工，不過也有不少年輕人認為在這段時間脫離安舒區，或能成人生事業轉捩點。

今次 #點人訪 請來兩位現職開IG小店Cajel & Co的兩位90後店主Agnes和Emily，跟大家分享疫境下創業的決心和快樂。

創業本意：想為香港人帶來正能量

今年兩位都僅20出頭的小妮子Agnes和Emily，本為公關公司同事，奈何如前文所提過PR工時長、人工低，令兩位投身社會短短數年的小女生都不禁萌生脫離之意，Agnes：「呢兩年因為疫情所以多咗WFH，但WFH唔代表你少咗工作，反而客戶仲會覺得你24小時on call，所以做PR嗰陣每日都做到好夜，就算放假都寧願喺屋企休息，完全唔想出街。」

一班衛道之old seafood若然聽到班後生話因為工作辛苦而辭職，實會走出來指責「阿叔當年夠乜乜乜啦，咪又係咁捱咗幾廿年！」不過，Agnes和Emily冇有怕，更異口同聲：「而家唔做等幾時？」

Emily：「喺我地未做到好高職級嘅時會容易啲離開；但如果我係做咗好多年，又做到好高級嗰陣，可能就已經捨棄唔到。」誠然，20幾歲還是一個能夠任性，可以勇敢向外闖的年紀，old seafood指責，可能正因為他們捨棄不得那高薪厚職、或是因成了養家的支柱，Agnes：「我地而家就係冇嘢輸。」

Agnes和Emily的IG小店名為《Cajel》，Agnes：「個名係橙、柑類食物嘅西班牙文，我地就係想呢間鋪俾到人好refreshing嘅感覺，打開會有啲汁咇出嚟咁。哈哈哈哈~」果然年青就是滿滿的衝勁和歡樂。

提到開IG shop的原意，更是滿腹理想，Emily：「香港女仔好似我地呢啲年紀多數只會去大牌子買返工衫，我地嗰陣就會成日碌IG Shop，Agnes：「不過IG Shop啲質素好參差，所以我地就希望可以引入多啲由韓國直送，高質素嘅衫俾到女仔做選擇。」Emily：「而家疫情下香港人都好壓抑，我地呢間鋪都會散播好多正能量俾大家，例如有時會出啲self-love嘅post，希望大家就算唔買衫，睇到都會開心。」

活用PR經驗和知識為品牌注入獨特性

兩人即使PR有關經驗尚淺，但足以活用於創業路上，Agnes：「我地做PR知道branding好重要，所以我地好重視產品嘅packaging，例如設計、紙質我地都揀咗好多款，而且喺每件貨物寄出時都會精心噴上香水，希望客人可以記得我地嘅brand story。 」Emily：「我地仲特登幫品牌做咗brand guidlines，希望可以保持到品牌嘅一致性；做PR時練落嘅writing skills其實而家都用得返，例如出post時寫啲乜、點樣寫可以吸引到客人多啲。我地自己仲會做個content calendar，編排好哂每日出啲咩，好有規劃。」

做生意難免會遇到西客，Agnes：「通常客人對於我地回覆嘅速度有意見，例如因為而家COVID所以運輸物流上時間會耐咗，客人就會好緊張DM我地，可能嗰日我地出咗去shooting，客人又咁啱睇到我地個story見到我地shooting，咁佢就會DM問點解唔覆佢。雖然都有啲煩惱，但呢啲我地覺得係『開心嘅煩惱』。」

市面不少賣衫的IG Shop女生都是高高瘦瘦，老實說，絕不是編輯杯茶。反觀Cajel分別有兩個女生以自身身出樣兼出身材，參考度更高，Agnes：「我地嘅身型都比較貼近普通香港女仔身型，一高一矮，成件事就貼地啲。」客人單看能更易聯想。

COVID創業路難行家人、朋友支持：而家做嘢開心咗

雖說「年輕冇嘢輸」，但在疫情下貿然脫離一份有穩定收入的職業，在大眾看來都是一個不智之舉，Agnes：「初頭屋企人都會擔心同質疑，佢地覺得好兒戲。」Emily：「佢地會覺得你搞咩呀？仲會問『咩係IG Shop？』不過我地開咗差唔多一年嘅時間，佢地都見到我地有心做，慢慢就轉為支持我地。」Agnes：「佢地都見我個人開心咗，因為之前份工實在太攰。」

其實兩位在創業初期都會質疑自己，Agnes：「都會有想過放棄，但好彩有朋友互相提醒。有好多人話職場上冇朋友，但我就覺得好幸運可以喺職場上識到好好嘅朋友，到而家仲一齊做生意，一齊打拼，互相俾動力大家。」現在成了小老闆，兩人均異口同聲指最大的滿足感正是來自客人的好評。

由一個打工仔搖身一邊成為老闆，心態與之前做PR時有很大分別，人也成長了不少，Agnes：「其實而家嘅工作時間比之前更長，但因為係做緊屬於自己嘅嘢，所以個積極性會唔同。」即使要做24小時都是開心事，Emily：「不過正是因為自己生意，所以自律性要好高，有別於打工，打工係老細叫你做咩就做咩，佢唔叫真係可以唔洗做。」